Wednesday, November 21, 2012

මඩුවන්වෙල වලව්ව | Maduwanwela walawwa

                                 රත්නපුරේ කිව්වහම මතක් වෙන්නේ හැමතිස්සෙම වැස්ස තියන තෙත් පළාතක් නේද...? එත් රත්නපුරේ පහු කරගෙන ඇඹිලිපිටිය පැත්තට යනකොට තියෙන්නේ ඊට වඩා සම්පුර්ණයෙන්ම වෙනස් දේශගුණයක්.හරියට වැස්සක් නැති, දවසපුරාම වැටෙන තද අව්වට පිළිස්සෙන කදුකර පරිසරයක් තමා ඔය කියන ඇඹිලිපිටිය පැත්තේ දකින්න තියෙන්නේ...පුද්ගලිකව මම නම් නුවරඑලිය වගේ තෙත් කදුකර පළාතකට වඩා වියලි කදුකර පළාත් වලට කැමතියි...වේලිච්ච ගස්වැල් වලින් ඇහෙන "සර සර" හඬත් වියලි කදුකරේ පිසගෙන හමන හුළඟත් හිතට ගේන්නේ වචන වලින් කියන්න බැරි අමුතුම හැගීමක්.ඉවරයක් නැතිව දඟර ගැහි ගැහී කදු අස්සෙන් යන පාලු පාරෙත් ඊට පහලින් පුංචි පුංචි දිය පාරවල් ගලන නිම්නයේත් ගැබ්වෙලා තියෙන්නේ පුදුමාකාර තනිකමක් කිව්වොත් නිවැරදියි.....මේ ලිපියෙන් කියන්න බලාපොරොත්තු වෙන මඩුවන්වෙල වලව්වත් පිහිටලා තියෙන්නේ ඔය කියන ප්‍රදේශයේ..යන්න පාරවල් නම් කීපයක්ම තියනවා. නමුත් ලේසිම විදිය තමයි ඇඹිලිපිටියෙන් කොලොන්නට තියන පාර... වලව්ව හොයාගන්න එක නම් එච්චර අමාරු වැඩක් නෙමේ...ඇඹිලිපිටියේ ඉදන් කොලොන්න පැත්තට එනකොට කොලොන්න හන්දිය හම්බවෙන්න පොඩ්ඩකට මෙහායින් පාර අයිනේම වගේ තමයි මඩුවන්වෙල වලව්ව පිහිටල තියෙන්නේ...

මඩුවන්වෙල වලව්ව (Maduwanwela walawwa)
                  මඩුවන්වෙල ප්‍රදේශයට ඒ නම ලැබිල තියෙන්නේ "කුළු මී හරකුන් බහුලව සිටින වෙල" කියන අදහසින්.දෙවැනි විමලධර්මසූරිය රජතුමා (ඒ කියන්නේ ක්‍රි.ව 1800 විතර) මඩුවන්වෙල විජයසුන්දර ඒකනායක අභයකෝන් මුදලිවරයාට මේ ඉඩම් සන්නසකින් භාරදීලා මුදලිවරයා ඒ ඉඩමේ මේ වලව්ව හදපු බවටයි ඉතිහාසයේ සදහන් වෙන්නේ.
                  මීට අවුරුදු 100කට විතර කලින් කාමර 121ක් සහ මැදමිදුල් 21ක් තිබුණු බවට  සදහන් උනත්  වර්තමානයේ  දකින්න ලැබෙන්නේ  කාමර 42ක් එක්ක මැදමිදුල් 7 ක් පමණයි.විශේෂිත ලී උළුවහු සහ අනෙකුත් ගෘහනිර්මාණ අංග වලට අමතරව වලව්ව ගැන ප්‍රසිද්ද කරුණු කීපයක්ම තියනවා...එකක් තමයි ගෙබිම අලංකාර කරන්න අල්ලලා තියන පිගන් කටු රටාවන්.වලව්වේ එක තැනක එංගලන්තයේ මහරැජිනගේ රුපයක් කකුලට පැගෙන විදියට සවිකරලා තියනවා...අනෙක වලව්වට ඇතුලුවෙන තැන තියන ගල් අරුක්කුව.සුද්දෙක් වලව්වට එනවනම් අශ්වයාගේ පිටින් බැහැල හෝ ඔලුව පාත් කරලා එන්න වෙන විදියට තමා මේක නිර්මාණය කරලා තියෙන්නේ...මේදේවල් වලට හේතුව මුදලිවරයා තදින්ම අධිරාජ්‍යවාදීන් පිළිකුල් කිරීම කියල තමයි මටනම් හැඟෙන්නේ....ඇතුලත සවිකරලා තියන උළුවහු  උනත් තරමක් මිටි පුද්ගලයෙකුට හැරුනහම සාමාන්‍ය කෙනෙකුට ඔලුව පහත් නොකර යන්න බැහැ..මේකට හේතුව  මිටි පුද්ගලයෙකු වන මුදලිවරයාගේඋසේ ප්‍රමාණයට උළුවහු නිර්මාණය කරලා තිබීම බවයි ප්‍රදේශ වාසීන්ගේ අදහස...මඩුවන්වෙල බලන්න යන කෙනෙකුට ඒ ලගින්ම පිහිටලා තියන  සුප්‍රසිද්ධ වවුල්පනේ හුණුගල් ගුහාවත් බලාගෙනම එන්න පුළුවන්....

ඇතුළුවන දොරටුව

මඩුවන්වෙල වලව්ව
ඇතුළුවීමේ දොරටුව 2



පිගන්ගඩොල් රූ රටා
පයට පැගෙන රැජින



තරප්පුව

ඉහල මාලය






ඇඹිලිපිටියේ ඉදන් කොලොන්නට යන  මාර්ගය
ඇඹිලිපිටියේ ඉදන් කොලොන්නට යන  මාර්ගය



 අතරමගදි හම්බඋන අමුතු හන්දියක්  "කෑල්ල හන්දිය"  

Friday, November 2, 2012

ඕලු ඇල්ල | Olu Fall

          ලංකාවේ උසින් පස්වෙනි තැන ගන්න ඕලු ඇල්ල (127m) පිහිටලා තියෙන්නේ කෑගල්ල දිස්ති‍්‍රක්කයේ යටියන්තොට ප්‍රදේශයේ...සංචාරකයෝ අතර එච්චරම ප්‍රසිද්ධ නැති උනත් ශ්‍රිලංකාවේ පස්වෙනි තැනට උසම දිය ඇල්ල විදියටත් කොළඹට ආසන්නයේම පිහිටලා තියන ප්‍රමාණයෙන් විශාල දිය ඇල්ලක් විදියටත් ඕලු ඇල්ල නම් කරන්න පුළුවන්....ඇල්ල පිහිටල තියන තැන හරියටම කියනවනම් යටියන්තොටින් මලල්පොල හරහා සීපොන් වලට තියන පාරේ (B482) 16 වෙනි කිලෝමීටර් කනුව ගාව තමා තැන.
         ඕලු ඇල්ල හරහා දාල තියන ලී පාලම හින්ද  ඇල්ල කොටස් දෙකකට වෙන් වෙනවා.මේ ලී පාලම දැනට ලංකාවේ භාවිතයේ තියන පැරණිතම ලී පාලම විදියට හදුන්වන්න පුළුවන්.වැස්ස කාලෙට නම් ලී පාලම උඩින් වතුර දානවාලු.
           දුන්හිද,බඹරකන්ද වගේ දිය ඇලි වලට වඩා ඕලු  ඇල්ල වෙනස් වෙන්නේ තනි දියපාරක් වෙනුවට පුංචි පුංචි දියඇලි ගණනාවක එකතුවක් වීමයි... 
          ඇල්ල නිර්මාණයවෙන්නේ වී ඔයේ අතු ගංගාවකින්.වී ඔය අවසානයේ කැළණි ගඟට එකතුවෙනවා.මීට අමතරව දියඇල්ල ලඟින්ම පිහිටලා තියන වේවැල්තලාව තේ වත්තේ රවුමක් දාල යන්නත් අමතක කරන්න එපා...මගදි හම්බවෙන තේ කර්මාන්ත ශාලාවෙන් අවසර ගත්තනම් වැඩේ හරි.

යන  පාර



අපි ගියපු ජීප් එක

සම්පුර්ණන දියඇල්ලේ චායාරූපයක්



අතරමගදී හම්බඋන සංගිලි පාලම


ජීප්පුවේ අයිතිකරු

ලීපාලම යටඉදන්



ගමන ආපු කට්ටිය

රුවන්වැල්ල පාලම
වී ඔය (නාන්න කියාපු තැන )

Wednesday, October 17, 2012

කිරිගල්පොත්ත (Kirigalpoththa - Second highest peak in Srilanka).......


            ලංකාවේ උසම කදු මුදුන් වලින් දෙවැනි ස්ථානය ගන්න කිරිගල්පොත්ත කන්ද  පිහිටලා තියෙන්නේ හෝර්ටන් තැන්නේ.කඳු මුදුනට ළඟාවෙන්න,හෝර්ටන් තැන්නේ ලෝකාන්තය බලන්න යන ඇතුල් වීමේ ඉදන් කිලෝමීටර් 7ක් විතර පයින් යන්න වෙනවා.අපි ගමන පටන්ගත්තේ ඔහිය දුම්රිය ස්ථානයෙන්.ඔහියේ ඉදන් කිරිගල්පොත්ත කන්ද නැගල පට්ටිපොලින් එලියට ආපු අපේ සම්පුර්ණ ගමන කිලෝමීටර්36ක් විතර උනා.කදු නගින්න කැමති කෙනෙකුට වගේම හෝර්ටන් තැන්නේ ටිකක් ඇතුලට ඇවිදින්න කැමති කෙනෙකුට කිරිගල්පොත්ත සුදුසුම ස්ථානයක්....


           තෙවැනියට උස තොටුපොල කන්ද පිහිටලා තියෙන්නෙත් හෝර්ටන් තැන්නෙමයි.ජනප්‍රවාද වලට අනුව කිරිගල්පොත්ත කන්දෙත්  තොටුපොල කන්දෙත් ඉතිහාසය රාවණා රජු දක්වා දිවයනවා.රාවණා පුවතේ එන ත්‍රිකූට කදු යනු පිදුරුතලාගලත් කිරිගල්පොත්තත් තොටුපොලත් බව විස්වාස කරනවා.තොටුපොල කන්දට ඒ නම ලැබෙන්න හේතුව රාවණා රජුගේ දඩුමොණරය ගොඩබානලද  ස්ථානයක් නිසා බවටද විස්වාසයක් තියනවා.
            තණ පදුරුවල ලාකොළ පැහැයත් කුරු උණ පැදුරු වල තරමක් තද කොළ පැහැයත් නිල පැහැති අහසේත් සුදු පැහැති මීදුම් කැටි වලත් සුන්දර වර්ණ මිශ්‍රණයක් හෝර්ටන් තැන්න ගමන පුරාවටම දකින්න පුළුවන්. හෝර්ටන් තැන්නදි බහුලව දකින්න ලැබෙන්නේ ගෝන්නු උනත් වාසනාවකට හරි අවාසනාවකට හරි දිවියෙක් උනත් කලාතුරකින් හම්බවෙන්න පුළුවන්.
        කිරිගල්පොත්ත ගමනේදී අපිට එක්තරා අවාසනාවන්ත සිද්ධියකට මුහුණපාන්න උනා.ඔහිය දුම්රියපොලේ ඉදන් අපි පයින් එනකොට ස්ටේෂන් එකේ හිටපු බල්ලො දෙන්නෙකුත් අපේ පස්සෙන් ආවා.මුලදී අපි ඕක එච්චර ගණන්ගත්තෙ නැහැ...නමුත් හෝර්ටන් තැන්නේ ආපනශාලාව ගාව හිටපු කෙනෙක් බල්ලෝ දෙන්න දැකල අපෙන් මෙහෙම ඇහැව්වා..

   "මල්ලි , මේ බල්ලෝ දෙන්නත් අවේ ඔයගොල්ලෝ එක්කද...?"

   "ඔව්... ඔහියේ ඉදන් අපේ පස්සෙන් අවේ..."

   "ඔය ඉතින් මුන්දෙන්නගේ අන්තිම දවස තමයි.....! "  
  
   මිනිහ එකපාරටම එහෙම කිව්වම අපිට පුදුම හිතුනා...

   "ඒ මොකද......?"

  "දිවියට බල්ලන්ගේ ඉව දැනුනහම මුන් පස්සෙන් ඇවිත් අල්ලගන්නවා...දිවිය දැක්කට පස්සෙ මුන්    දුවන්නෙත් නෑ බයට ..."
මේක ඇහුවහම අපිටත් පොඩි බයක් ඇතිඋනා...මොකද මුනුත් අපිත් එක්කම ඇවිදගෙන එනහින්ද.....
        කිරිගල්පොත්ත කදු මුදුනට යද්දී මුන්දෙන්න අපිත් එක්ක ආවේ නැහැ...ආපනශාලාව ගාව කෑම තිබ්බ හින්ද වෙන්න ඇති....ඒ උනත් අපි කිරිගල්පොත්ත නැගල ආපහු ආපනශාලාව ගාවට එනකොට එතන හිටියේ  එක බල්ලයි...! කෙටි විවේකයකින් පස්සේ අපි පට්ටිපොළට යන ගමන පටන්ගත්තේ කරුවල වැටෙන්න කලින් හෝර්ටන් තැන්නෙන් එලියට යන්න  ඕන හින්ද...අර ඉතුරු වෙච්ච බල්ලත් අපේ පස්සෙන්ම ආවා.ටිකදුරක් යනකොට උගේ හැසිරීමත් ටිකක් අමුතු උනා.එක තැනකදී මූ පාර මැද නැවතිලා කැලෑව දිහා එකදිගට බලාගෙන හිටියා...ඔය වෙද්දි අපි කීපදෙනෙක් ආවේ ඉස්සරහින්...ටිකක් පිටිපස්සෙන් ආපු මගේ මිත්‍රයෙක් දැකල තියනවා කැලේ ඇතුලෙන් බල්ල දිහා බලාගෙන හිටපු දිවියෙක්ව...එත් එක්කම බල්ල කැලෑවේ අනිත් පැත්තට පැන්නා...දිවියත් ඒ එක්කම අතුරුදහන් උනා කියලයි ඌව දැකපු මගේ මිත්‍රය නම්  කිව්වේ...ඊට පස්සේ අපි ගොඩක් දුර ආවත් අර බල්ලව නම් ආපහු දැක්කේ නෑ...පොඩි කනගාටුවක් ඇති උනත් අපිටත් ඒ වෙලාවෙ කරන්න දෙයක් තිබ්බේ නැහැ...හැබැයි සමහරවිට ඌ බේරෙන්නත් ඇති....


තණ පදුරුවල ලාකොළ පැහැයත් කුරු උණ පැදුරු වල තරමක් තද කොළ පැහැයත් නිල පැහැති අහසේත් සුදු පැහැති මීදුම් කැටි වලත් සුන්දර වර්ණ මිශ්‍රණයක් හෝර්ටන් තැන්න ගමන පුරාවටම දකින්න පුළුවන්.....
දිවියාගේ අඩිසලකුණු




සිංහරාජයේ අරුණාලෝකය | Morning side


         සිංහරාජයට ඇතුළුවන ප්‍රවේශයන් කීපයක් තියනවා.ඒ අතරින් කුඩාව,පිටදෙනිය සහ මෝර්නින් සයිඩ් ප්‍රධාන තැනක් ගන්නවා.මෝර්නින් සයිඩ් හෙවත් හිමිදිරි පෙදෙස පිහිටල තියෙන්නේ සුරියකන්ද පැත්තේ.(ඒකියන්නේ රක්වානයි දෙනියයයි අතර).මේ පැත්තට මෝර්නින් සයිඩ් කියල නම වැටෙන්න හේතුව තමයි මේ ප්‍රදේශයෙ දේශගුණය මුළු දවස පුරාම උදෑසන කාලය වගේ තිබීම.සංචාරකයින්ට මෝර්නින්සයිඩ් වල තියන  බංගලාවේ නවාතැන් ගන්න පුළුවන්, නමුත් එන්න කලින් බත්තරමුල්ලේ තියන වනසංරක්ෂණ කාර්යාලයෙන් අවසර ගැනීම අනිවාර්යයි.මෝර්නින් සයිඩ් බංගලාවට සුරියකන්දෙ ඉදන් යන්න මාර්ග දෙකක් තියනවා.එක මාර්ගයක් වැටිල තියෙන්නේ සිංහරාජේ කැලේ මැදින්. (කාල්ටන් වතුයායෙන් තමා පටන්ගන්නේ).අනෙක මෝර්නින් සයිඩ් වතුයාය හරහා වැටිලා තියෙනවා.හැබැයි මෝර්නින් සයිඩ් වතුයාය හරහා යන මාර්ගය නම් පුද්ගලික එකක්...නමුත් පයින් යනව නම් ගැටළුවක් නැහැ.
                             වැස්ස කාලෙක නම් කූඩැල්ලන් නිසා ගමන ටිකක් අමාරුයි.නමුත් මෝර්නින් සයිඩ් කියන්නේ සංචාරයේදී  අමතක නොකලයුතුම ස්ථානයක්.දියඇලි සහ ස්වභාවික තටාක  කීපයක්ම මෝර්නින් සයිඩ්වලදි හම්බවෙනවා.එයින් කුඩා දිය ඇලි කීපයක්ම  තියෙන්නේ මෝර්නින් සයිඩ්වතුයාය පටන්ගන්න ප්‍රදේශයේ.තවත් ඇල්ලක් මෝර්නින් සයිඩ් වතුයාය සහ බංගලාව අතර මාර්ගයෙදි දකින්න පුළුවන්.මීට අමතරව මෝර්නින් සයිඩ් බංගලාවේ ඉදන් පටන් අරගෙන කැලේ ඇතුලෙන් පිහිටලා තියන දුවිලි ඇල්ලට  යන්න පුළුවන් මාර්ගයකුත්  තියනවා .නමුත් දුවිලි ඇල්ලට යන මාර්ගය මෑතකදී භාවිතා කරලා නැති නිසා එක ටික අවදානම් වැඩක්..!



වැස්ස හින්ද කාපු කට්ටක් ...!

                            













ගමන  ආපු කට්ටිය
                             

Related Posts Plugin for WordPress, Blogger...