Showing posts with label වනාන්තර සංචාර. Show all posts
Showing posts with label වනාන්තර සංචාර. Show all posts

Friday, April 12, 2013

සිංහරාජයේ පුරාණ ගම්මාන | Pitadeniya-Lanka gama


"බොහොම ඉස්සර කාලෙක මේ කැලේ ඉඳල තියනවාලු දරුණු සිංහයෙක්... කැලේ මැද්දෙන් ගිය මිනිස්සුන්ට මේ සිංහයා හරියට කරදර කරලා තියනවා...ලංකා කියල තරුණයෙක් මේ සිංහයාට ගල් වලින් ගහල මරල තියනවලු....ඔය සිංහගලට යන පාරේ තියන අමුතු ගල්ගොඩ සිංහයා මරලා දාපු තැන කියලයි ගම්මු විස්වාස කරන්නේ...ලංකා කියන තරුණය හිටපුගම තමා ලංකා ගම කියල අදටත් පැවත එනනෙ..."
-------------------------------------------------------------------------------------------------------------------------
     වෙලාව උදේ හතට විතර ඇති.සුදු පාට බෝඩ් ලෑල්ලක කලුපාට රවුම් අකුරින් දෙනියාය - අකුරැස්ස කියල ලියපු රතු පාට ලංගම බස් එක වංගු වලින් හැරි හැරී ගමන් කෙරුවේ බොහොම හෙමින්...පුංචි පුංචි කඳු ගැට වල බොහොම පිලිවලට වවල තිබ්බ ලා කොළ පැහැති තේ වගාවනුත්,කහ පාටින් පීදිලා තිබුන වෙල්යායත්,මීදුමින් බර වෙච්ච කඳු වැටිත් හිතට ගෙනාවේ පුදුම සැහැල්ලුවක්....අකුරැස්ස - දෙනියාය හරහා සූරිය කන්ද පැත්තට යන පාර ලංකාවේ තියන සුන්දරම මාර්ග වලින් එකක්....සිංහරාජ වනාන්තරයට මායිම් වෙලා තියන මේ පැත්ත එතරම්ම ජනාවාස වෙලා නැති හින්දදෝ කොහෙද  තවමත් මෙහේ තියන සුන්දරත්වය බොහොම හොඳින් ආරක්ෂා වෙලා තියන බවක් තමා පෙනුනේ...

     ඔහොම යන අතර මගදී පාර දෙපැත්තේ වවල තිබ්බ අමුතු පොල් වගාවකුත් දකින්න ලැබුන....මම නම් හිතන්නේ මේවට කියන්නේ කටු පොල් කියල...අපි දෙනියායෙන් බැහැල ඊට පස්සේ නැග්ගේ මෙදිරිපිටිය කියන බස් එකට....පිටදෙනිය ඇතුළු වීමෙන් සිංහරාජ වනාන්තරය සංචාරය කරන්න යනවා නම් මුලින්ම මෙදිරිපිටියට යන්න ඕන...අපේ අරමුණ උනේ සිංහරාජයේ ඇතුලේ පිහිටලා තියන පිටදෙනිය සහ  ලංකා ගම කියන පැරණි ගම්මාන දෙකත් ඒ අවට වනාන්තරයත් සංචාරය කරන්න.
"මම නම් හිතන්නේ මේවට කියන්නේ කටු පොල් කියල..."
     මෙදිරි පිටියේ ඉදන් පිටදෙනියට තිබ්බේ ගිංගඟේ ඉවුරත් එක්කම වගේ වැටිලා තිබ්බ පුංචි අඩි පාරක්.අපි නවතින්න හිතාගෙන ගියපු වන නිවහන තිබ්බෙත් ගිංගඟේ ඉවුරෙමයි. ඔතන ගඟ හරස් කරලා වැල් පාලමක් බැඳලා තිබ්බා .ඔය වැල් පාලමට වෙලා අක්කර දාස් ගානක් පැතිරුණ සිංහරාජය  දිහා පැය ගානක් උනත් බලාගෙන ඉන්න පුළුවන්....


වැල් පාලමට වෙලා අක්කර දාස් ගානක් පැතිරුණ සිංහරාජය  දිහා පැය ගානක් උනත් බලාගෙන ඉන්න පුළුවන්....
     පලවෙනි දවසේ නම් වැඩිය ඇවිදින්න උනේ නැහැ...පහල ගඟෙන් හොදට නාගෙන කෑම එහෙම කාල ඉවර වෙනකොට හවස හතරත් පහුවෙලා.....පාලමට පොඩ්ඩක් එහායින් තිබ්බා ආරනුව දොළ කියල ගිංගඟේ අතු ගංගාවක්...ඔන්න ඔය දියපාර හරස් කරලා හදල තිබ්බා යකඩ පාලමක්....
"දන්නවද මේ පාලමේ වැදගත්කම ...?"
"මේකේ එක කොනක් අයිති වෙන්නේ මාතරට...අනික ගාල්ල දිස්ත්‍රික්කෙට......! "
     ඔහොම කිව්වේ අපිත් එක්ක ආපු ගයිඩ්...ඉස්සර වගේ නෙමේ දැන් ඔය පැත්තෙන් සිංහරාජෙට යනවනම් ගයිඩ් කෙනෙක් එක්කම යන්න ඕන....

   හවස ආපහු නවාතැනට එද්දි අපිට හම්බඋනා පොලොන් තෙලිස්සෙක්...මං දන්න විදියට කුණකටුවා කියන්නෙත් මූටම තමා. කොළ රොඩු අස්සේ හිටපු මූව දැක්කෙත් අහම්බෙන් වගේ....පෑගුනානම් ඉතින් ඉවරයි තමයි....!

     ඊළඟ දවසෙ උදේ පාන්දරම අපි ලංකා ගම දිය ඇලි බලන්න පිටත් උනා....කැලේ මැද්දෙන් යන ගමනේදී අපිත් එක්ක ආපු ගයිඩ් එක එක ගස් ජාති පෙන්න පෙන්න ඒවායෙ නම්,ප්‍රයෝජන එහෙම කියන්න ගත්තා...මුලදී අපි  ගස් වල නම් මතක තියාගන්න ට්‍රයි එකක් දුන්නත් දිගටම ඕක කොරන්න පුලවන් උනේ නෑ...මම ජීවිතේ පලවෙනි පාරට කැහිබෙල්ලෙක් දැක්කේ මෙහෙදී....හැබැයි ෆොටෝ එකක් ගන්න තරම් ලඟට දැක්කේ නෑ ...:(

ඊට අමතරව වලිකුකුළා,දඬු ලේනා,ඇහැටුල්ලා,පිනුම් කටුස්සා,පලා කටුස්සා කළු උකුස්සා වගේ සත්තු කීපදෙනෙකුත් ගමන අතර මගදී දකින්න ලැබුනා....


     ලංකා ගම සිංහරාජේ ඇතුලේ තිබ්බත් දැන් නම් ගොඩක් දියුණු ගම්මානයක්.නමුත් මේක ගොඩක් ඉස්සර ඉදන්  තිබිච්ච ගමක් කියලයි අහන්න ලැබුනෙ...
"මහත්තයා, මේකැලේ ගැන අපි දන්න දේවල් වලට වඩා නොදන්නා දේවල් වැඩී....තාම මිනිස්සු පය නොගහපු තැන් ඕනතරන්.. කැලේ යද්දි පාර වැරදුනොත් දෙයියන්ගේම පිහිට තමා...මං දන්න කාලේදී නම් සිංහයෝ ගැන අහන්න ලැබිල නෑ....බොහොම ඉස්සර කාලෙක මේ කැලේ ඉඳල තියනවාලු දරුණු සිංහයෙක්... කැලේ මැද්දෙන් ගිය මිනිස්සුන්ට මේ සිංහයා හරියට කරදර කරලා තියනවා...ලංකා කියල තරුණයෙක් මේ සිංහයාට ගල් වලින් ගහල මරල තියනවලු....ඔය සිංහගලට යන පාරේ තියන අමුතු ගල්ගොඩ සිංහයා මරලා දාපු තැන කියලයි ගම්මු විස්වාස කරන්නේ...ලංකා කියන තරුණය හිටපුගම තමා ලංකා ගම කියල අදටත් පැවත එනනෙ..."
ඔන්න ඔහොමයි ලංකාගම ගැන අපිට අහන්න ලැබුනෙ...
"සිංහරාජේ දැන් සිංහයෝ නැතිඋනත් දිවියෝ ඉන්නවා.මහත්තයා දැකල තියනවද කළු දිවියා...? බොහොම කලාතුරකින් තමා කළු දිවියෙක් දකින්න ලැබෙන්නේ...අලි උනත් ඉන්නවා.. එක කාලෙකට  ගම්වලටත් කඩාපාත් වෙනවා...එත් ලොකු කරදරයක් නම් නෑ..."
     සිංහරාජය ගැන පුරාවෘත්ත ගොඩක් තියනවා..ඒවයින් එක කතාවක් තමයි කැලේ මැද්දේ තියනව කියල විස්වාස කරන රජ මාලිගාව...කවුරුවත් ඔය කියන මාලිගාව දැකල නැති උනත් ගම්මු විස්වාස කරනවා කැලේ මැද්දේ කොහේහෝ රහස් ස්ථානයක රජ මාලිගාවක නටබුන් තියනවා කියන එක....සමහර විට එක ඇත්ත වෙන්නත් පුළුවන්..මොකද සිංහරාජේ එක එක යුගයන් වලදී ලංකාවේ තිබ්බ එක එක රාජධානි වල උරුමයක් විදියට සලකල තියනවා....ඉතින් කවුරු හරි රජ කෙනෙක් සතුරු ආක්‍රමණයක් ගැන හිතල කැලේ මැද්දේ ඔය වගේ තැනක් හැදුව වෙන්න බැරිද...?
මේක නම් ඉතින් රජ මාලිගාවක් නෙමේ.... ...!
මේක නම් මාලිගාවක් තමා ...හැබැයි ඇවිදින එකක් .....
    මීළඟට කියන්න යන්නේ ලංකාගම ආසන්නයේ කැලේ ඇතුලට වෙන්න තියන දියඇලි කීපයක් ගැන.පලවෙනි එක තමයි බ්‍රාහ්මණ ඇල්ල.පහලින් දක්වල තියෙන්නේ බ්‍රාහ්මණ ඇල්ලෙ ෆොටෝ එකක්....


එතකොට මේක තමයි තට්ටු ඇල්ල...
තට්ටු ඇල්ල
ඌරන් වැටුණු ඇල්ල (අනිත් ඒවත් එක්ක ගත්තහම මේක තරමක් ලොකු ඇල්ලක්) නම වැටිල තියන විදිය හිතා ගන්න පුළුවන්නේ....??
ඌරන්ට මොන සෞඛ්‍යයද කියල හැම මගුලේම ඇවිද්දත් අපි මෙතන නම් එච්චර දඟලන්න ගියේ නැහැ...කකුල් හතරක් තියන ඌරොත් වැටුනානම් අපි ගැන මොන කතාද...?? :) 


ගල්ඔරුව (මේක තරමක් වෙනස් තැනක්.ඇල්ලක් කිව්වට පටු ගල් බිත්ති දෙකක් අස්සෙන් වේගයෙන් ගලාගෙන යන දිය පාරක් කිව්වොත් වඩා නිවැරදියි).මේක බලන්න යන එක තරමක් අවදානම් වැඩක්.යන්තමින් හරි කකුල ලෙස්සුවොත් නවතින්නේ අඩි ගානක් පල්ලෙහා ගල් කුහරෙ අස්සේ...

දූවිලි ඇල්ල - සිංහරාජේ දූවිලි ඇලි කීපයක්ම තියනවා.මේක ඒවායින් එකක්.නාගන්න නම් කියාපු තැන...
දූවිලි ඇල්ල  
     හවස පිටදෙනියේ වන නිවහනට ආපහු එන ගමන් පිටදෙනිය ගම ආසන්නව පිහිටලා තියන තවත් ඇල්ලක් බලන්න ලැබුනා කැකුණ ඇල්ල කියල.මේකේ තටාකය ගොඩක් ගැඹුරුයි. අපිත් එක්ක ආපු ගයිඩ් අපිට අනතුරු ඇඟව්වා නාන්න නම් එපා කියල...
"මේක බලන්න ආපු එක්කෙනෙක් ඔතන නාන්න ගිහින් ගිලිලා මැරුණා...මිනිය ගොඩ ගත්තේ ආමි එකෙන්.."

කැකුණ ඇල්ල
     අපේ නවාතැනට එනකොට ටිකක් හවස් වෙලා තිබුනා...නාගෙන එහෙම රෑ කෑම එක හම්බ වෙන කන් පොඩි චැටක් දාගෙන ඉදිද්දී දන්නෙම නැතුව කරුවල වැටිලා.

     කරුවලේම අපි සංගිලි පාලම දිගේ ගඟ මැදට ඇවිදගෙන ගියා.හඳ වලකුලකින් වැහිල තිබ්බ නිසා පට්ට කරුවලයි.නමුත් රෑට ගඟේ සද්දේ වඩා පැහැදිලිව ඇහෙනවා.....පැය ගානක් උනත් එකදිගට ගඟේ ඝෝෂාව අහගෙන ඉන්න පුළුවන්....එක පාරටම වගේ හඳ වලාකුළුවලින් මෑත් උන හින්ද අපිට පහලින් ගලාගෙන යන ගඟත් වනාන්තරයත් පැහැදිලිව දකින්න ලැබුන... හඳ එලිය වැටුණු වනාන්තරයෙත් ගඟ දියෙත් සුන්දරත්වය වචන වලින් කියන්න තේරෙන්නේ නැහැ....ඒවගේ තැනකට ගිහිල්ලම තමා බලන්න ඕන...

     ඊළඟ දවසේ පාන්දරම අපි ටිකක් කැලේ ඇතුලට ගියේ තවත් දිය ඇලි දෙකක් බලන්න.යන අතර මගදි දැකපු දෙයක් තමයිමේක...පේනවද මේ ගහේ කඳේ තියන අමුතු කැපුම් පාර...?
     මේ තියෙන්නේ දොරණ කියල ගස් වර්ගයක්.ඉස්සර මිනිස්සු දොරණ තෙල් ගන්න මේ විදිහට ගහේ කඳ හරහා කපල යටින් භාජනයක් තියනවලු.හැබැයි මෙහෙම කරාම ගහට වෙනදේ  ගැන අහන්න ඕන නැහැනේ...:(  
     ගහක් ගැන කතාවක් පටන් ගත්ත හින්ද මේගමම්ම ගමනේදී දැකපු තවත් ගස් දෙකතුනක් ගැන කියල දාන්නම්...අහල තියනවා නේද සිංහරාජේ තියන යෝධ නවද ගහ ගැන...?එක තියෙන්නේ කුඩාව පැත්තේ...පිටදෙනියේදි අපිට හම්බඋනා ඒ වගේම යෝධ ගහක්...හැබැයි මේක හොර ගහක්...
යෝධ හොර ගහ 
     රූපලාවන්‍යයට උනන්දු අයට පහල තියන ගහ බොහොම වැදගත් එකක්...මේවට කියන්නේ කොකුම් පොතු කියල.මමත් ඔය නම අහලතිබ්බත් ගහ දැක්කේ එදාමයි...

 කොකුම් පොතු  
     එතකොට මේවට කියන්නේ වල්කෝපි කියලලු...බලන්න කෝපි වගේම නේද කියල....? 
වල්කෝපි  
    මොණර කුඩුම්බිය කියලගස් ජාතියකුත් අපිට හම්බ උනා මගදි.හැබැයි මේ අපේ ගෙවතු වල දකින්න තියන වර්ගේ නම් නෙමෙයි.මේක මොණරෙක්ගේ ඔලුවේ තියන කොටස වගේම හින්ද වෙන්න ඇති ඔය නම වැටිල තියෙන්නේ...

මොණර කුඩුම්බිය
   ඔහොම යන අතරමගදි අපි දැක්ක බිම වැටිලා ඉන්න යෝධ මකුළුවෙක්...මටනම් හිතෙන විදිහට මේකා දිවි මකුළුවෙක්....දිවි මකුළුවෝ කියන්නේ බොහොම විෂ සහිත සතෙක්...දෂ්ට කලොත් එහෙම මාරාන්තිකයි කියලයි අහල තියෙන්නේ...මූ හිටියේ පුංචි සතෙක්ව අල්ලාගෙන....අපි වැඩිය ලඟට ගියේ නැහැ....ඉල්ලන් කන්නේ මොකටද ඉතින්...:)
මටනම් හිතෙන විදිහට මේ දිවි මකුළුවෙක්
    ඇමේසන් වගේ වනාන්තර වල ඉන්නවලු දරුණු කුහුඹු වර්ගයක්  ඕනම සතෙක් විනාඩි කිහිපයක් ඇතුලත කාල දාන්න පුළුවන්.ඔය වගේ කුබි ජාතියක් ගැන ෆිල්ම් එකකුත් තිබ්බ වගේ මතකයි.මේ යෝධ කුඹි රැල දැක්කහම අපිට මතක් උනේ අර කියපු දරුණු කුබි වර්ගෙ ගැන.මුන් හම්බඋනේ මල්මොර ඇල්ලට යන පාර අතර මගදි.ගෙරි කුබි කියලයි මුන්ට  කියන්නේ....අරවගේ දරුණු ජාතියක් නම් නෙමේ.හැබැයි කඩියෙක් විතර ඇති සයිස් එක.



දෙවැනි දවසේ බලන්න ගිය පතන් ඔය ඇල්ලත් මල්මොර ඇල්ලත් පිහිටලා තියෙන්නේ මහ වනය මැද්දේ...ගමන ටිකක් දුරයි.දවස් දෙකක් ඇතුලත දිය ඇලි අටක් බලපු අපිටත් දිය ඇලි එපාඋන එකේ මේක කියවන ඔයාලට කොහොම එපා වෙයිද....හේ හේ ....
පතන් ඔය ඇල්ල
මල්මොර ඇල්ල
 ගත්ත ෆොටෝ සේරම දාන්න ගියොත් මේක ඉවරයක් වෙන්නේනැහැ...මල්මොර ඇල්ල බලල දවල් දොළහ විතර  වෙද්දි අපිට ආපහු නවාතැනට එන්න ලැබුනා.බඩු ටික එහෙම පැක් කරගෙන ආපහු යන්න ලැහැස්ති උනේ ගොඩක් රෑ වෙන්න කලින් කොළඹට යා ගන්න ඕන නිසා...ලිපිය අවසාන කරන්න කලින් ගමනේ අතරමගදී ගන්න ලැබුන තවත් සේයාරූ කීපයකුත් දාගෙනම යන්නම්.දවසක් විතර කට්ට කාගෙන ටයිප් කරපු හින්ද කොමෙන්ටුවක් දාගෙනම යන්න හොඳේ....:)
කිතුල 
Time to say good bye...

Sunday, February 17, 2013

වන නිවහන (ෆිෂින් හට්ස්) | Fishing huts - Sripada via Rajamale


වන නිවහන 

        කඳුකර වැසිවනාන්තරයෙන්  පෝෂණය වන වනනදිය, ඇතැම් විට ගල්පර අතරින් රැළිති නංවමින්ද තරමක් ගැඹුරු තැන්වල ඉතා නිහඬවද ගලාබසී.හිරුරැස් ගඟ මත පතිතව, එහි දිය රැළිති වල සෙවනැලි ගං පතුලේ ඇති තැඹිලි පැහැති ගල්කැට මත සියුම් වූත් සුන්දර වූත් රටාවන් මවාලයි.සුළඟ එතරම් රළු නොවුනද,තුරුමත ඉදුණු, කහ පැහැති පත්‍රයක් දෙකක් නදිය මත පතිත කරවන්ට තරම් එය පොහොසත්ය.

         ඉහත කී වන නදිය අසබඩ දැවයෙන් කල කුඩා නිවසකි.මෙය වූ කලී වචනයේ පරිසමාර්ථ අර්ථයෙන්ම වන නිවහනකි.බිත්ති, වහලය සහ  කවුළු පමණක් නොව එහි වූ සෑම කුඩා අංගයක්ම සාදා ඇත්තේ අවට වනයෙන් සපයාගෙන ඇති ලී දඬු එකට පිරිද්දීමෙනි.නේකවර්ණවූ කුරුල්ලන්ගේ නාදයත් දිය රැලි නගන හඬත් හැර වෙනත් කිසිදු ශබ්දයක් මෙහි සිටින්නන්ට නෑසෙනු ඇත.මෙහි එක් පසකින් බැලුවිට පෙනෙන්නේ නිල අහස තෙක් පැතිරුණු ලාකොළ පැහැයෙන් දිදුලන මරේ තේ වතුයායයි.ඊට සැතපුම් කීපයක් එපිටින් සුදු පැහැති වලාවන් සිපගනිමින් වැජබෙන  සිරිපා කඳු මුදුන දැකගත හැකිය.අනෙක් පසින් ඇත්තේ සුන්දර බත්තුළු ඔයත් ඉන් එපිට අක්කර දහස් ගණනක් පැතිර ඇති සමනල කන්ද වැසිවනාන්තරයත්ය.
හිරුරැස් ගඟ මත පතිතව, එහි දිය රැළිති වල සෙවනැලි ගං පතුලේ ඇති තැඹිලි පැහැති ගල්කැට මත සියුම් වූත් සුන්දර වූත් රටාවන් මවාලයි 

ශ්‍රී පාදය 

      උණුසුම් හිරුරැස් ඇති දිනයක මම, වන නිවහන පිහිටි ඉවුරේ සිට අනෙක් ඉවුර දක්වා පිහිනා ගියෙමි...නදිය හරහා යාම එතරම් අපහසු කටයුත්තක් නොවේ.නමුත් මෙහි ජලය කෙතරම් පැහැදිලිද කිවහොත් අඩි දහයක් විස්සක් තරම් ගැඹුරු තැන් වුවද අපට පෙනුනේ අඩි කිහිපයක් පමණක් ගැඹුරු ස්ථාන ලෙසිනි...ගං දිය තරමක් සීතල නිසා පළමු දිනයේදී අපට වැඩි වේලාවක් දිය නෑම සිදුකල නොහැකි විය...සීතල මගහරින්නට වන නිවහනින් ලැබුණු උණුසුම් දිවා ආහාරය නම් ප්‍රනීතය....


උණුසුම් හිරුරැස් ඇති දිනයක මම, වන නිවහන පිහිටි ඉවුරේ සිට අනෙක් ඉවුර දක්වා පිහිනා ගියෙමි.

      දිවා ආහාරයෙන් පසු මගේ මිත්‍රයින්  සූදානම් වූයේ තවත් වික්‍රමයකටය. එනම් වන මැද සැඟවුණු බත්තුළු ඔයේ දිය ඇල්ලක් සොයා යාමටය..මේ සඳහා ගඟ දියේ ඉහත්තාවට පැය එකහමාරක් පමණ ගමන් කල යුතුය....ගඟ දිගේ ගමන ඉතා දුෂ්කර කටයුත්තකි...එක්ව සැදුනු ලොකු කුඩා ගස් වැල් නිසා අපට වනය හරහා ගමන් කල නොහැකි බැවින් එකම විකල්පය වූයේ ගඟ මත වූ ගල් කුළු මතින් ඉදිරියට යාමයි...නොගැඹුරු තැන් වලදී  ගඟ මැදින් ගමන් කල අපි ඇතැම් ස්ථාන වලදී ගංඉවුරේ ගල් කුළු මතින් ඇවිද ගියෙමු...ඉවුර මත වූ ගල්කුළු බොහොමයක් පාසි බැඳීම නිසා ඉතා ලිස්සන සුළුය.කැමරාවක්ද රැගෙන ගමන් කල නිසා මගේ ගමන සිදු වූයේ අන් අයට වඩා සෙමිනි...වරක් පාසි බැඳුනු ගලක් මතුපිටින් යන විට පය ලිස්සීමෙන් මගේ සමබරතාවය ගිලිහී ගිය අතර කැමරාව පසකට විසිවී ගියේය...ගල දිගේ ලිස්සා ගොස් මගේ වම් වැලමිට තදින් යමක වැදුන මුත් එකවරම අනෙක් අත අසල වූ ගල් නෙරුවක සිරකර ගැනීමට හැකිවූ නිසා හානිය අවම කර ගැනීමට හැකි විය.
      කුඩා දියඇලි කිහිපයක් හමුවීමෙන් පසු අපි ගඟ දෙකට බෙදෙන ස්ථානයකට ලඟාවීමු.මෙම ස්ථානයට සිරිපා මලුව වඩා පැහැදිලිව පෙනේ..මින් කුඩා දිය පාර සිරිපා කන්ද ඔස්සේ ගලන බවක් පෙනුණු අතර  අප සොයා යන ඇල්ල තරමක් විශාල නිසා, ජල ප්‍රමාණය වැඩි, වම පසින් වූ දියපාර දිගේ ගමන්කිරීමට අපි තීරණය කළෙමු.


ගඟ දිගේ 
        කොතරම් ඉදිරියට ගියද ඇල්ලක සේයාවක්වත් වත් නැත...කරුවල වැටෙන්නටද ආසන්නය.සැබවින්ම අප තෝරාගත්තේ නිවැරදි මාර්ගයද ....? මංසන්දියේදී හමුවූ,සිරිපා කන්ද ඔස්සේ ගලන දියපාර තරමක් කුඩා වුවද ඉන් දිය ඇල්ලක් ඇතිවිය නොහැකිද....? මෙවන් දෑ කල්පනා කරමින් අපි ගඟ දිගේ තවත් වංගුවක් පසු කළෙමු....

     මේවනවිට අප සිටියේ ගංගාවේ දකුණු පසිනි.තවත් කුඩා ඇල්ලක් අපේ නෙතු ගැටේ....එය අපට පෙර හමුවූ දියඇලි වලට වඩා තරමක් විශාල වුවද එහි උස අඩි දහයක් පමණ විය....අසා තිබු විස්තරයට අනුව අප සොයා ආ ඇල්ල මෙය විය නොහැක.....
     චායාරුපයක් ගැනීමට ගඟේ අනෙක් පසට ගිය විට එකවරම අප සොයා පැමිණි දේ පැහැදිලිව පෙනිණි. ...අඩි පනහක් පමණ උස්වූ තරමක් විශාල ප්‍රමාණයේ දියඇල්ල මෙතෙක් වෙලා අපට නොපෙනුනේ ගඟ දෙපස වූ ගල්කුළු නිසාවෙනි....මෙහි නියම නම හෝ නිවැරදි උස හරිහැටි නොදන්නා මුත් එය සුන්දර බවින් නම් අඩුවක් නැත....ගමනේ අපහසුම අංගය වුයේ ඇල්ල පාමුලට යාමයි...යන්තමින් හෝ පය ලිස්සා ගියහොත් නතර වෙන්නේ කුඩා ඇල්ලේ තටාකයෙහිය..අවසානයේ ගංඉවුරට නැමුණු ගස් අතු වල එල්ලී,තරමක අවදානම් ගමනකින්  පසු අපට ඇල්ලේ පාමුලට ළඟාවීමට හැකිවිය.


අවසානයේ ගංඉවුරට නැමුණු ගස් අතු වල එල්ලී,තරමක අවදානම් ගමනකින්  පසු අපට ඇල්ලේ පාමුලට ළඟාවීමට හැකිවිය

        අප නැවත වන නිවහන කරා එනවිට කරුවල වැටී තිබින...තේ වත්තත් යුකැලිප්ටස් වනාන්තරයත් අතරින් සිරිපා මළුවේ ආලෝකයත් එහි ගමන් මාර්ගයත් යන්තමින් පෙනේ.හෙට උදයේම සිරිපා කරුණා කලයුතුය...මෙවර සිරිපා වන්දනාවට අප තෝරාගත්තේ මරේ වතුයායෙන් පටන්ගන්නා රජමලේ මාර්ගයයි.විදුලි ආලෝකය නොමැති බැවින් අප යායුතුව තිබුනේ දහවල් කාලයේදීය...




   වන නිවහනේ රාත්‍රිය නිහඩය..විචිත්‍රය..සීතල නිසා අපි නදිය අසබඩ ගිනිමැලයක් දල්වාගත්තෙමු.නදියේ ගෝෂාව පරයා විවිධ සතුන්ගේ සිහින් නාදයන් එකදිගට ඇසේ.ගංඉවුර අසල දැවයෙන් තනා ඇති අසුනකට බරවූ මම වනය තුලින් ඇසෙන විවිධ ශබ්දයන් හඳුනාගන්නට තැත් කිරීමි..ගමන් වෙහෙසත් නදියේ ගීතයත් නිසා මැදියමට පෙර මට නින්ද යන්නට ඇත.





උදැසනම අපි ගඟේ ස්නානය කළෙමු.කලාතුරකින් දක්නට ලැබෙන කැහිබෙල්ලන් රංචුවක්ද ගල් කුළු මතින් පැනයන වලිකුකුලෙක්ද තවත් නම් නොදන්නා පක්ෂීන්  කිහිපදෙනෙක්ද අපේ ඇසට හසුවිය.උදැසන කාලයට අප මෙන්ම වනාන්තරයද ගඟදියද වඩා ප්‍රබෝධමත් බවකින් යුක්තබැව් මට සිතේ.


දහවල් දහය පමණ වනවිට සිහින් පොද වැස්සක් වැටෙන්නට විය...වැහිබින්දු නදිය මත වැටී ගංපතුලේ දර්ශන අපැහැදිලි විය...වැස්ස පායනතුරු සිටි අපි වන නිවහනට ආයුබෝවන් කියා සිරිපා කරුණා කරන්නට මරේ වත්ත කෙලවරකින් වනාන්තරයට පිවිසීමු...
වැස්සට පසු 



බත්තුළු ඔය 



         රජමලේ මාර්ගය සිරිපා මළුවට ඇති කෙටි මගකි.බොහෝවිට  මළුවට බඩු ගෙනයන්නන් භාවිතා කරන්නේ මේ මාර්ගයයි.නොනැවතී ගමන් කළහොත් පැය දෙක හමාරකින් පමණ මහගිරිදඹට ළඟාවිය හැක...කැලෑ මග අතරදී කූඩැල්ලන් අපට විටින් විට කරදරකලද එය අපේ ගමනට එතරම් බාධාවක් නොවිනි.


 රජමලේ (සඳගල තැන්න) මාර්ගය
      සිරිපා වන්දනාවෙන් පසු රාත්‍රිය සිරිපාමලුව තුල ගතකල අපට උදැසන ඉර සේවය බැලීමට නොහැකි වුයේ අධික මීදුම නිසාවෙනි.උදැසන 7.30 පමණ වනවිටද මීදුම පහව නොගිය හෙයින් මිහිදුමෙන් මතුවී පෙනෙන අඩවිකන්ද,කුණුදිය පර්වතය ඇතුළු අවට කඳුවැටි වල මනස්කාන්ත දර්ශනයන් කිහිපයක් අපට මගහැරිනි.අප උදැසනම නල්ලතන්නි මාර්ගයෙන් පහලට කරුණා කරන්නට පටන්ගත්තේ දහවල් හැටන් වලින් කොළඹ දක්වා යන දුම්රිය අල්ලා ගැනීමේ බලාපොරොත්තුවෙනි.


රජමලේ මාර්ගය අතරමගදී 



අපේ නඩේ




නල්ලතන්නිය-හැටන්මාර්ගයේ මුල්ගම හන්දියේ සිට ෆිෂින් හට්ස් දක්වා ඇති මාර්ගය  කොළ  පැහයෙන්ද මරේ වත්තේ සිට ඇති රජමලේ මාවත රතු  පැහැයෙන්ද දක්වා ඇත.


සටහන :  
  • වන නිවහනේ නැවතීමටනම් 052–4920870 අංකය අමතා මස්කෙළිය වතුයායේ කාර්යාලයෙන්  අවසර ගෙන දින වෙන්කිරීමක් කරගත   යුතුය.
  • දැනට පවතින පහසුකම් අනුව අටදෙනෙකුට නැවතිය හැකි වන නිවහනක්ද හය දෙනෙකුට නැවතිය හැකි නිවහන් දෙකක්ද ෆිෂින් හට්ස් තුල පවතී.
  • ගමන් මාර්ගය - හැටන් > මුල්ගම හන්දිය (නල්ලතන්නිය මාර්ගය)> ෆිෂින් හට්ස් මාර්ගය (මෙහි කිලෝමීටර් 8ක් පමණ ගමන්කලයුතුය.බස්රථ නොමැති වුවත් පොදු ප්‍රවාහනය සිදුකරන වෑන් රථ වල හෝ ත්‍රීරෝද රථ මගින් ෆිෂින් හට්ස් දක්වා ගමන් කල හැක.)

Related Posts Plugin for WordPress, Blogger...